🌷മനസ്സുവെച്ചാൽ🌷

വൈദികന്റെ മുഖമുദ്രയാകണം പരിത്യാഗം. ഇതിന് പകരം, പലരും കർമ്മ ബഹുലതകൊണ്ട് തങ്ങളുടെ ദിനങ്ങളെ നിറയ്ക്കുന്ന നിരവധി പേരുണ്ട്. ഈശോയുടെ പ്രേഷ്ഠശിഷ്യന്മാർ പോലും കുരിശിന്റെ നിയോഗത്തെ വല്ലാതെ ഭയന്നു എന്നാണ് സത്യം. അത്യാവേശം വാളെടുത്ത് വെട്ടാൻ ആണ് പത്രോസിനെ പ്രേരിപ്പിച്ചത്. പകരം രക്ഷകനു കരുതലോടെ കാവൽനിന്ന് ചുറ്റുപാടും നിരീക്ഷിക്കുകയും, പ്രാർത്ഥനയിൽ ആവുന്നത്ര സമ്പൂർണമായി പങ്കുചേരുകയും ചെയ്തിരുന്നെങ്കിൽ നാഥനോടൊപ്പം പതറാതെ നിൽക്കാൻ പത്രോസിനു കഴിയുമായിരുന്നു. പക്ഷേ, കഴിഞ്ഞില്ല പ്രാർത്ഥനയുടെ നാഴികയിൽ അലക്ഷ്യനായി അവൻ നിദ്രയിൽ മുഴുകി. ജാഗരൂകരായി കാവൽ നിൽക്കാത്ത, പ്രാർത്ഥനയിൽ ആശ്രയം തേടാത്ത പുരോഹിതനു ആത്മീയതയുടെ രുചി തന്നെ നഷ്ടപ്പെടും. ആധ്യാത്മികതയെ ലാഘവബുദ്ധിയോടെയാവും അവൻ കാണുക. ധ്യാനം, ആത്മശോധന, ആത്മീയ വായന, (ജ്ഞാന വായന) അടുക്കലടുക്കലുള്ള കുമ്പസാരം, ഇവയൊക്കെ പലപ്പോഴും മുടക്കം വരുത്തുകയോ, അഥവാ “കടത്തു കഴിയുന്ന”തുപോലെ നിർവ്വഹിക്കുകയും ചെയ്യും. പൗരോഹിത്യത്തിന്റെ അഭിഷേകം ക്രമേണ അവനു നഷ്ടപ്പെടുന്നു. ചൂടോ തണുപ്പോ ഇല്ലാതെ നിർവീര്യനാകുന്നു; “ഉറ കെട്ടു പോയ ഉപ്പ് ” ആയി മാറ്റുന്നു.

ക്രൈസ്തവന്റെ നിഘണ്ടുവിൽ, വൈദികന്റെയും നിരാശ എന്ന പദം ഇല്ല; ഉണ്ടാവുകയും അരുത്. പ്രത്യാശ ഒരുവനെയും നിരാശനാക്കുന്നില്ല. പ്രത്യാശയിലേക്ക് വരാൻ നിദ്ര വിട്ട് ഉണരുക. എന്തെന്നാൽ ഇപ്പോൾ രക്ഷാ നമ്മൾ പ്രതീക്ഷിച്ചിരുന്നതിനേക്കാൾ അടുത്തെത്തിയിരിക്കുന്നു. രാത്രി കഴിയാറായി. പകൽ സമീപിച്ചിരിക്കുന്നു. ആകയാൽ അന്ധകാരത്തിന്റെ പ്രവർത്തികൾ പരിത്യജിച്ച് പ്രകാശത്തിന്റെ ആയുധങ്ങൾ ധരിക്കാം. പകലിനു യോജിച്ചവിധം പെരുമാറാം. സുഖലോലുപതയിലോ, വിഷയാസക്തിലോ, കലഹങ്ങളിലോ, അസൂയയിലോ വ്യാപിരിക്കാതിരിക്കാം. കർത്താവായ ഈശോമിശിഹയെ ധരിക്കാം. ദുർമോഹങ്ങളിൽലേക്ക് നയിത്തക്കവിധം ഭൗതികചിന്തകളിലും വേഴ്ച്ചകളിലും വ്യാപരിക്കാതിരിക്കാം (റോമ 13:11-14).

കർത്താവിലും അവിടുത്തെ ശക്തിയുടെ പ്രഭാവത്തിലും കരുത്ത് ആർജ്ജിക്കുക. സാത്താന്റെ കുടിലതന്ത്രങ്ങളെ എതിർത്തുനിൽക്കാൻ ദൈവത്തിന്റെ സകല ആയുധങ്ങളും ധരിക്കുക. സത്യംകൊണ്ട് അരമുറുക്കുക. നീതിയുടെ കവചം ധരിച്ച് ഉറച്ചുനിൽക്കുക. സമാധാന സംസ്ഥാപകനാകുക. വിശ്വാസത്തിന്റെ പരിച എടുക്കുക. ദൈവവചനമാകുന്ന ആത്മാവിന്റെ വാൾ എടുക്കുക. നിരന്തരം പ്രാർത്ഥിക്കുക; അതായത് ആത്മാവിൽ പ്രാർത്ഥനാ നിരതനായിരിക്കുക. ( എഫേ. 6: 10 -17). സന്തോഷത്തോടെ ഇരിക്കുക. എല്ലാറ്റിനും ദൈവത്തിന് നന്ദി പ്രകാശിപ്പിക്കുക. ഇതാണ്, മശിഹായിൽ, നിങ്ങളുടെ ദൈവഹിതം. തെസ5:16-18) തിന്മയുടെ ദിനത്തിൽ ചെറുത്തുനിൽക്കാനും എല്ലാ കർത്തവ്യങ്ങളും നിറവേറ്റി പിടിച്ചുനിൽക്കാനും ആത്മാർത്ഥമായി മനസ്സ് വെക്കുന്ന ഏവനും സാധിക്കും. (എഫേ. 6:13)