🌹🌼ഒരുപോലെ🌹🌼

🌸🌹ഇസ്രയേലിന്റെ പുനരുദ്ധാരണം ജറമിയായിലെ ഒരു പ്രധാന പ്രമേയം ആണ്. നാശത്തെയും തദനന്തരമുള്ള രക്ഷയെയും സമാനമായാണ് പ്രവാചകൻ അവതരിപ്പിക്കുന്നത്. പലയിടങ്ങളിലും നാശത്തിന്റെ വിവരണങ്ങൾ ഉണ്ടെങ്കിലും അവയെല്ലാം തന്നെ രക്ഷയുടെ വിവരണങ്ങൾക്ക് വഴി മാറുന്നുണ്ട്. ഐശ്വര്യവും സൗഖ്യവും സുരക്ഷിതത്വവും സന്തോഷവും കളിയാടുന്ന ഭാവി ഇസ്രായേലിനെ കുറിച്ചാണ് 33 :7ൽ പ്രവാചകൻ സംസാരിക്കുന്നത്. എന്നാൽ പുനരുദ്ധാരണത്തിന് കാരണമാകുന്നത് ദൈവത്തിന്റെ നിരുപാധികമായ “ക്ഷമ”യാണ്. പാപത്തെ ദൈവം കോപംകൊണ്ട് നേരിടുമ്പോൾ (ദൈവത്തിന്റെ കരുണയും ക്ഷമയ്ക്കും അർഹമാകാത്ത പാപം) നാശവും അക്ഷന്തവ്യമെങ്കിൽ നിത്യ നാശം തന്നെ – ക്ഷമ കൊണ്ട് നേരിടുമ്പോൾ രക്ഷയും കൈവരുന്നു എന്ന ആശയമാണ് 33: 5- 8 അവതരിപ്പിക്കുക. ഇവിടെ ഒരു വസ്തുത പ്രത്യേകം മനസ്സിലാക്കേണ്ടതുണ്ട്. ദൈവത്തിന്റെ കാരുണ്യമാണ് അവിടുത്തെ ക്ഷമയുടെ അടിസ്ഥാനം. ആ മഹാ കാരുണ്യത്തിന്റെ കുത്തൊഴുക്കാണ് അവിടുത്തെ ക്ഷമ. അവിടുത്തെ കാരുണ്യം അതിന്റെ പാരമ്യത്തിലെത്തുന്നത് പെസഹാ രഹസ്യം, കാൽവരി യാഗം, കൂദാശകൾ, ഏറ്റം സവിശേഷമായി പരിശുദ്ധ കുർബാന ഇവയിലാണ്. കൂദാശകൾ എല്ലാം ക്ഷമയോട് ബന്ധപ്പെട്ടാണല്ലോ നിൽക്കുക!.🌸🌹

🥀🌼 ദൈവം നല്കുന്ന ശിക്ഷണവും അതേത്തുടർന്നുള്ള രക്ഷയും പാപത്തിന്റെ ഗൗരവം, ദൈവത്തിന്റെ കരുണ ഇവ ഒരുപോലെ വെളിപ്പെടുത്തുന്നു. മുൻ പ്രവചനങ്ങളിലെ ചില അടിസ്ഥാന ചോദ്യങ്ങൾക്കുള്ള ഉത്തരങ്ങൾ ജെറിമിയ 33 :1- 13 വാക്യങ്ങളിൽ കണ്ടെത്താനാവും. ഗിലെയാദിലെ സുഖപ്പെടുത്താനുള്ള ഔഷധം എവിടെ? (8:22)എന്ന ചോദ്യത്തിന് ദൈവത്തിന്റെ കരുണാർദ്രക്ഷമ എന്ന ഉത്തരമാണ് ഈ വചനഭാഗം നൽകുക. (വാ.11).🥀🌼

🌹🌼 രക്ഷ, ദൈവത്തിന്റെ കരുണയാൽ ആണ് സംഭവിക്കുന്നത് എന്ന് ജെറമിയായുടെ വീക്ഷണം(33:8) പുതിയ നിയമത്തിലും ഏറെ പ്രസക്തം തന്നെ. മനുഷ്യന്റെ അനുതപാത്തി നും പ്രായശ്ചിത്ത പ്രവർത്തികൾക്കും ഏറെ സാംഗത്യമുണ്ടെങ്കിലും അവയല്ല, ദൈവത്തിന്റെ കരുണയാണ് അവിടുത്തെ ക്ഷമയ്ക്ക് നിദാനമാകുന്നത്. ദൈവീക കരുണ സ്വീകരിക്കാൻ മനുഷ്യനെ പ്രാപ്തനാക്കുന്ന ധർമ്മം മാത്രമേ പരിഹാരകർമ്മങ്ങൾക്കുള്ളൂ. ഈശോമിശിഹായിലൂടെ വെളിപ്പെടുത്തപ്പെട്ട ദൈവകാരുണ്യത്തിന്റെ ഫലമായാണ്‌ രക്ഷയെ പുതിയനിയമം അവതരിപ്പിക്കുന്നത്.🌹🌼