ഈശോയുടെ ജനന വാർത്ത കന്യകാമറിയാതെ അറിയിച്ച ഗബ്രിയേൽ ദൈവദൂതൻ തന്നെയാണ് അതിനു ആറു മാസം മുമ്പ് സ്നാപകയോഹന്നാന്റെ ജനനവാർത്ത അറിയിച്ചത്. ആബിയയുടെ കുടുംബത്തിൽപ്പെട്ട സക്കറിയ എന്ന പുരോഹിതൻ ഒരു ദിവസം ബലി സമർപ്പിക്കാൻ വന്നപ്പോൾ ദൈവദൂദൻ സകറിയയോട് പറഞ്ഞു: “നിന്റെ ഭാര്യ എലിസബേത് ഒരു പുത്രനെ പ്രസവിക്കും. അവനു യോഹന്നാൻ എന്ന് പേരിടണം… അയാൾ കർത്താവിന്റെ മുമ്പിൽ വലിയവനായിരിക്കും. വീഞ്ഞോ മറ്റു ലഹരി വസ്തുക്കളോ അയാൾ പാനം ചെയ്യുകയില്ല. അമ്മയുടെ ഉദരത്തിൽ വച്ചുതന്നെ അവൻ പരിശുദ്ധാത്മാവിനാൽ നിറയും” (ലുക്കാ. 1, 13 -15 ).
ഈ വാക്കുകൾ സക്കറിയ വിശ്വസിച്ചില്ല; അതിനാൽ കുട്ടി ജനിക്കുന്നതുവരെ അയാൾ ഊമനായിരിക്കുമെന്നു മാലാഖ കൂട്ടിച്ചേർത്തു. മാലാഖയുടെ വാക്കുകളനുസരിച്ചു എലിസബേത് ഗർഭിണിയായി. ആറാം മാസം ഈ വിവരം അറിഞ്ഞ കന്യകാമറിയം എലിസബത്തിനെ ശ്രുശ്രുഷിക്കാനായി ചെന്നു. മറിയം എലിസബത്തിനെ അഭിവാദനം ചെയ്ത മാത്രയിൽ ഗർഭസ്ഥ ശിശു തുള്ളിച്ചാടുകയും അവൾ പരിശുദ്ധാത്മാവിനാൽ പൂരിതയാകുകയും ചെയ്തു. യഥാസമയം കുട്ടി ജനിക്കുകയും യോഹന്നാൻ എന്ന് പേരിടുകയും ചെയ്തു.
യോഹന്നാൻ മരുഭൂമിയിൽ സ്വല്പം തേനും കിഴങ്ങുകളും ഭക്ഷിച്ചു കടുത്ത തപോനിഷ്ഠയിൽ ജീവിച്ചു. പ്രായശ്ചിത്തത്തിന്റെ ജ്ഞാനസ്നാനം പ്രസംഗിച്ചുകൊണ്ടിരുന്നു. ജോർദാൻ നദിയിൽവച്ചു ക്രിസ്തുവിനു ജ്ഞാനസ്നാനം നൽകി. “കർത്താവിന്റെ വഴികൾ ഒരുക്കുവിൻ” എന്ന് മരുഭൂമിയിൽ വിളിച്ചുപറയുന്ന സ്വരമായിട്ടാണ് യോഹന്നാൻ തന്നെത്തന്നെ വെളിപ്പെടുത്തിയത്.ജനങ്ങൾ അദ്ദേഹം തന്നെയായിരിക്കും രക്ഷകനെന്നു വിചാരിച്ചു. അപ്പോൾ അദ്ദേഹം പറഞ്ഞു താൻ രക്ഷകനല്ലായെന്നും രക്ഷകന്റെ ചെരുപ്പിന്റെ ചരടുകൾ അഴിക്കാൻ കൂടി തനിക്കു യോഗ്യതയില്ലായ്ന്നും.
ഈശോ യോഹന്നാനെ പറ്റി പറഞ്ഞത് സ്ത്രീകളിൽ ജനിച്ചവരിൽ സ്നാപകനേകാൾ വലിയവനില്ലന്നും കാറ്റത്തു ആടുന്ന ഞാങ്കണ അല്ലന്നുമാണ്. കുറ്റങ്ങൾ കുറ്റങ്ങളായി തന്നെ അദ്ദേഹം കണ്ടു; മുഖം നോക്കാതെ അത് ചൂണ്ടി കാണിക്കുകയും ചെയ്തു . അങ്ങനെ ഹേറോദേസിന്റെ കുറ്റം തുറന്നു പറഞ്ഞു ശിരസു നഷ്ടപ്പെടുത്തി.
