കന്യാകാംബികയുടെ മാതാപിതാക്കന്മാരാണ് അന്നയും ജൊവാക്കിമും. രണ്ടുപേരും ദാവീദിന്റെ ഗോത്രത്തിൽ ജനിച്ചവരാണ്. ജൊവാക്കിമിന്റെ തിരുനാൾ പ്രാചീനകാലം മുതല്ക്കും അന്നാമ്മയുടെ തിരുനാൾ നാലാം ശതാബ്ദം മുതല്ക്കും പൗരസ്ത്യസഭയിൽ ആഘോഷിച്ചിരുന്നു; പശ്ച്യാത്യ സഭയിൽ പതിനഞ്ചാം ശതാബ്ദം മുതൽ രണ്ടുപേരുടെയും തിരുനാളുകൾ ഘോഷിച്ചുതുടങി. തങ്ങളുടെ അസാധാരണ പുത്രിയുടെ സംസർഗ്ഗത്തിൽ ജൊവാക്കിമും അന്നയും അത്യധികം ആധ്യാത്മികാനന്ദം അനുഭവിച്ചു. തന്റെ കുഞ്ഞു ഉത്ഭവ പാപരഹിതയും സർവഥാ നിര്മലയുമാണെന്നുള്ളത് മാതാപിതാക്കന്മാർക്കു ആനന്ദകാരണമായിരിക്കുമല്ലോ. മകൾ ദൈവമാതാവായി തിരഞ്ഞെടുക്കപ്പെട്ടത് അറിഞ്ഞ നാൾ മുതൽ അവരുടെ സന്തോഷം എത്ര വർദ്ധിച്ചിരിക്കും!
ദൈവമാതാവിന്റെ അമ്മയായ അന്നാ എത്രയും വത്സലയാണ്; പേരിന്റെ അർഥം തന്നെ അനുഗ്രഹദായക എന്നത്രെ. അവളുടെ വാര്ധക്യത്തിലാണ് മറിയം ജനിച്ചത്; തന്നിമിത്തം എത്രയും വാത്സല്യത്തോടെയാണ് ഈ ശിശുവിനെ വളർത്തിയതെന്ന്‌ ഊഹിക്കാമല്ലോ. അമലോത്ഭവയായ ശിശുവിന്റെ ഓരോ കാല്വയ്പ്പും അന്നയ്ക്ക് വളരെ കൗതുകമായിരിക്കണം.
യഹൂദ ശിശുക്കൾ ദേവാലയത്തിൽ പുരോഹിതന്മാരുടെ മേൽനോട്ടത്തിൽ ശിശുഗ്രഹത്തിൽ താമസിക്കുന്ന ഒരു പതിവുണ്ടായിരുന്നുവെന്നു പറയുന്നുണ്ട്. തദനുസാരം അന്നാ തന്റെ ശിശുവിനെ മുന്ന് വയസുള്ളപ്പോൾ ദേവാലയത്തിൽ കാഴ്ചവച്ചുവെന്നു ഒരു പാരമ്പര്യമുണ്ട്. അതിനാൽ തന്റെ നിർമല ശിശുവിന്റെ സഹവാസത്തിൽനിന്നു ലഭിക്കാമായിരുന്ന ആനന്ദം അന്നാ ബലി ചെയ്തു.
ക്രിസ്തീയ കുടുംബങ്ങളുടെ മധ്യസ്ഥയാണ് അന്നാമ്മ. അവൾ നമുക്ക് അമ്മാമ്മയാണല്ലോ. അമ്മാമ്മയുടെ മാധ്യസ്ഥം തേടിയിട്ടുള്ളവർക്കെല്ലാം അസാധ്യമായ അനുഗ്രഹങ്ങൾ സിദ്ധിച്ചിട്ടുണ്ടെന്നു ക്രിസ്തീയ സാഹിത്യം സാക്ഷ്യപ്പെടുത്തുന്നു. ജെസ്റ്റീനിയന് ചക്രവർത്തി 550 ൽ കോൺസ്റ്റാന്റിനോപ്പിളിൽ വി. അന്നാമ്മയുടെ ബഹുമാനാർത്ഥം ഒരു ദേവാലയം പണിയുകയുണ്ടായി. 705 ൽ വേറൊന്നു ജെസ്റ്റീനിയന് ദ്വേതീയൻ നിർമിച്ചു. അന്നാമ്മയുടെ പേർക്ക് ഒമ്പതു ചൊവ്വാഴ്ച ഭക്തി എന്നും ഐർലണ്ടിൽ പ്രചാരത്തിലുണ്ട്.
അന്നാമ്മയുടെ ശേഷ്ട്ടത മറിയത്തിന്റെ അമ്മയായതുകൊണ്ടു മാത്രമല്ല; തന്റെ വത്സല പുത്രിയെ ദൈവത്തിനു കാഴ്ചവച്ചത് ദൈവസ്നേഹത്തിന്റെ പാരമ്യമല്ലെ?
