വിവാഹശേഷം ഭാര്യയും ഞാനും വാടകയ്ക്ക് വീടെടുത്ത് ഒരുമിച്ച് താമസമാരംഭിച്ചു. ആദ്യദിനം ഇൻഡക്ഷൻ അടുപ്പ് ഉപയോഗിച്ചപ്പോൾ മുതൽ ഒരു വാണിംഗ് മെസ്സേജ് ആണ് കാണിച്ചത്. ‘ERO2’ എന്ന എറർ കോഡും തെളിഞ്ഞു. ഞങ്ങൾക്ക് ഒന്നും മനസ്സിലായില്ല.
അതിന്റെ ബോക്സ് പരിശോധിച്ചപ്പോൾ യൂസർ മാനുവൽ കിട്ടി. ERO2 എന്താണെന്ന് അതിൽ വ്യക്തമായി കൊടുത്തിട്ടുണ്ടായിരുന്നു. ഞങ്ങൾ ഉപയോഗിച്ചിരുന്ന പാത്രം ഈ അടുപ്പിന് അനുയോജ്യമല്ല എന്നതായിരുന്നു പ്രശ്നം. പാത്രം മാറ്റിയപ്പോൾ പ്രശ്നം പരിഹരിക്കപ്പെട്ടു.
മനുഷ്യ നമുക്കും ഒരു യൂസർ മാനുവൽ ഉണ്ട്. നാം എന്ത് ചെയ്യണം,എന്ത് ചെയ്യരുത് എന്നും വിവിധ പ്രതിസന്ധികൾ ജീവിതത്തിൽ വരുമ്പോൾ അവയുടെ അർത്ഥം എന്താണെന്നും ജീവിതത്തിൽ വിജയം നേടാൻ ഏതു വഴിയെ പോകണം എന്നും വ്യക്തമാക്കിത്തരുന്ന യൂസർ മാനുവൽ – അത് മറ്റൊന്നുമല്ല വിശുദ്ധ ഗ്രന്ഥമാണ്.
മലയോരമേഖലയിലെ ടൗണിൽ ഒരു വീട് പണിയുന്നതിനായി സ്ഥലം വാങ്ങിയിരുന്നു. താമസിച്ചിരുന്ന സ്ഥലത്ത് നിന്നുകൊണ്ട് ടൗണിലെ വീടുപണി നോക്കി നടത്താൻ ബുദ്ധിമുട്ടായതിനാൽ എങ്ങനെ കാര്യങ്ങൾ ക്രമീകരിക്കും എന്ന് അദ്ദേഹം ചിന്തിച്ചു. ഒരു പരിഹാരം ലഭിക്കുന്നതിനായി വിശുദ്ധ ബൈബിൾ തുറന്നു. ” അവൻ സ്വന്തം ചെലവിൽ ഒരു വീട് വാടകയ്ക്ക് എടുത്ത് രണ്ട് വർഷം മുഴുവൻ അവിടെ
താമസിച്ചു ” (അപ്പോസ്തോല പ്രവർത്തനങ്ങൾ 28: 30 ) എന്ന വചനമാണ് അദ്ദേഹത്തിന് ലഭിച്ചത്. സുഹൃത്ത് നേരിട്ട പ്രതിസന്ധിയിൽ വിശുദ്ധഗ്രന്ഥം കൃത്യമായ പരിഹാരം നൽകി.
നിന്റെ ഇപ്പോഴത്തെ പ്രതിസന്ധിയിൽ, ഇപ്പോൾ നീ കടന്നുപോകുന്ന നിരാശയിൽ, നിന്നെ ശക്തിപ്പെടുത്തുന്നതിനായി ഒരു വചനം അനേകായിരം വർഷങ്ങൾക്ക് മുമ്പ് തന്നെ പരിശുദ്ധാത്മാവ് വിശുദ്ധ ഗ്രന്ഥത്തിലെ ഏടുകളിൽ കുറിച്ച് വെച്ചിട്ടുണ്ട്. ആയതിനാൽ മനസ്സിടിയുന്ന സമയങ്ങളിൽ വിശ്വാസത്തോടെ വിശുദ്ധഗ്രന്ഥം തുറക്കുക.
ഒരു വീട്ടമ്മയുടെ അനുഭവം. ഇവരും കുടുംബം ഒരു പ്രത്യേക സാഹചര്യത്തിൽ സ്വന്തം വീട്ടിൽ നിന്നും മാറി അവരുടെ തറവാട്ടിൽ താമസിക്കേണ്ടി വന്നു. എന്നാൽ അവിടെ അവർക്ക് ചില അസ്വസ്ഥതകൾ ഉണ്ടായി. വീട്ടിലേക്ക് തന്നെ തിരിച്ചു പോയാലോ…. അവർ ചിന്തിച്ചുതുടങ്ങി. ആ സമയത്ത് അവർ വിശുദ്ധഗ്രന്ഥം തുറന്നു വായിച്ചു. അപ്പോൾ അവർക്ക് കിട്ടിയ വചനം ” എന്തെന്നാൽ കർത്താവ് സീയോനെ തിരഞ്ഞെടുത്തു; അതിനെ തന്റെ വാസസ്ഥലം ആക്കാൻ അവിടുന്ന് ആഗ്രഹിച്ചു( സങ്കീർത്തനങ്ങൾ 132: 13) എന്നതായിരുന്നു. ഇപ്പോൾ തറവാട്ടിൽ നിൽക്കുക എന്നതാണ് തങ്ങളെക്കുറിച്ചുള്ള ദൈവഹിതമെന്ന അവർക്ക് അങ്ങനെ മനസ്സിലായി. അതിനാൽ അവർക്ക് അവിടുത്തെ സാഹചര്യങ്ങളോട് ക്രമേണ പൊരുത്തപ്പെടാൻ സാധിച്ചു.
തന്റെ മക്കളുടെ സുരക്ഷിതവും ആനന്ദകരവും രക്ഷാകരമായ ജീവിതത്തിനാവശ്യമായ എല്ലാ കാര്യങ്ങളും സ്നേഹപിതാവായ ദൈവം തന്റെ വിശുദ്ധഗ്രന്ഥത്തിൽ ഉൾചേർത്തിട്ടുണ്ട്. മനസ്സ് ശാന്തമാക്കി, പ്രാർത്ഥനയോടെ വിശുദ്ധഗ്രന്ഥം തുറന്നു വായിക്കുക. നിന്റെ ദൈവം നിന്നോട് സംസാരിക്കും. ” നീ വലത്തോട്ടോ ഇടത്തോട്ടോ തിരിയുമ്പോൾ നിന്റെ കാതുകൾക്ക് പിന്നിൽ നിന്ന്, ഒരു സ്വരം ശ്രവിക്കും ; ഇതാണ് വഴി ഇതിലെ പോവുക “( ഏശയ്യാ 30: 21).
ടിജോ തോമസ്
