സങ്കീർത്തനങ്ങൾ

അമ്പത്തിയേഴാം സങ്കീർത്തനം

സഹന സാഗരത്തിലും ദൈവമേ, സ്തുതി! സങ്കീർത്തനം 56ന്റെ കൂടപ്പിറപ്പാണ് 57. വ്യക്തിഗതവിലാപവും പരാതിയും ഇതിലും നിറഞ്ഞുനിൽക്കുന്നു. ഒപ്പം ഉടയവനിൽ ഉള്ള പരിപൂർണ്ണ ശരണവും. സാവൂളിൽ നിന്ന് ഓടിപ്പോയി ഒരു ഗുഹയിൽ ഒളിച്ചപ്പോൾ ദാവീദ് പാടിയതായിരിക്കാം ഇത് (1സാമു.22:1). പക്ഷേ സാധകന്റെ വിലാപവും പരാതിയും ഒരു ഗണം ശത്രുക്കൾക്കെതിരായിട്ട് അവരുടെ കൊടുംദ്രോഹങ്ങളെക്കുറിച്ചാണ്.  ഈ വ്യക്തിഗത വിലാപഗീതത്തിൽ 11 വാക്യങ്ങൾ ആണുള്ളത്. ഇവയിൽ 1, 5 ന്റെ ആവർത്തനമാണ്. 1-5 പീഡിതനു സഹായമരുളുന്ന ദൈവത്തെ അവതരിപ്പിക്കുന്നു. പീഡകളുടെ പിടിയിൽ ഞെരിഞ്ഞമരുമ്പോഴും സർവ്വശക്തനെ സാകൂതം സ്തുതിക്കുന്ന ദൈവഭക്തനെ 6-11 വരച്ചുകാട്ടുന്നു.  പ്രാർത്ഥനയോടുകൂടി ആരംഭിച്ച്, ദൈവാശ്രയം വ്യക്തമാക്കി, പരാതി യിലൂടെ പരതി, അവസാനം ദൈവമഹത്വം ഉച്ചൈസ്തരം ഉദ്ഘോഷിക്കുന്നു ഒന്നാം ഭാഗം. തനിക്ക് തികഞ്ഞ തുണയാകുന്ന നല്ല തമ്പുരാനെയാണ് സാധകൻ ഇവിടെ ഉയർത്തിക്കാട്ടുക.  രണ്ടാംഭാഗവും പരാതിയിൽ നിന്നു തുടങ്ങുന്നു. തുടർന്ന് സർവ്വനന്മയായ സർവ്വേശ്വരനെ സർവ്വത്മനാ…